25 Feb 2011
રાત દિવસ
વિરહમાં બળવા
આમંત્રણ છે
બારણે ટેકો,
રસ્તો તાંકવાને
આમંત્રણ છે
દર્દ હોયતો
આંખે ચોમાસુ થવા
આમંત્રણ છે.
તોડીને દિલને,
વીણવા ટૂકડાઓ
આમંત્રણ છે
રાત પડેને,
સપના બની આવ
આમંત્રણ છે
સપના વિજાપુરા
21 Feb 2011
16 Feb 2011
ખામોશીમાં બોલે છે આંખો તોફાની
મેળામાં મારાં ભેદ બધાં એ ખોલે છે
‘સપનાં’માં મારાં સાજન આવે છે તેથી
આંખો મારી મદનાં પ્યાલાઓ ઢોળે છે
સપના વિજાપુરા
11 Feb 2011
આ રચના આબુમાં સનસેટ પોઈન્ટ પર બેસી લખી છે ..આપનાથી દૂર છું પણ શબ્દોથી
નજીક છું.આપણી શબ્દોની સંગત રહેશે..
પૂર્વ માથી અચાનક નીકળેલ
ધીરે ધીરે આસમાનમાં ઊંચે ચડતો
ઇશ્વરનાં હુકમને બઝાવતો
અને ગિરીમાળામાં થઈને
સૂર્યાસ્તનાં સ્થળે પહોંચતો
પાછું વળી વળીને જોતો
વિસ્મયથી વિચારતો હતો
હશે કોઈ સ્વર્ગનો ટુકડો
સ્વર્ગથી છૂટૉ પડ્યો..
ઈશ્વરે હસીને પૂછ્યું
તે સ્વર્ગ જોયું છે કદી?
સપના વિજાપુરા
14 Jan 2011
9 Jan 2011
શીદીસૈયદની જાળીને
કાંકરિયાની પાળ
રીક્ષાઓની વણજાર
અજાણ્યા ચહેરા
અજાણ્યો સંસાર
સાબરમતી વિશાળ
એક બાદશાહે સપનું જોયું ને
બની ગયુ અમદાવાદ..
‘સપના’નું રળિયામણું ગામ.
સપના વિજાપુરા
28 Dec 2010
દુખમાં જે સાથ દેતા હોય છે
એજ દોસ્તીને સમજતાં હોય છે
બેવફાઈ તો છે કરનારા ઘણાં
હા, વફા કરનાર થોડાં હોય છે
દુખ સ્વજનથી જ મળતાં હોય છે
ક્યા હ્રદય પરજન રહેતાં હોય છે
હોય મક્તામા ભલે સપના રડી
આ ગઝલ વાંચી તે હસતા હોય છે
સપના વિજાપુરા
22 Dec 2010
મુક્ત થયું મન
આકાશ તરફ ઊડ્યું મન
એકજ માર્ગ છે મુક્તીનો મોક્ષનો
લવ લગાઉં હું તારાં પર
હું આવરણો ઉતારું મોહનાં
અને ઝંઝાળો દુનિયાની ત્યાગું
બંધનો બધાં તોડું
એક પંખીની જેમ ઊડું નિલગગનમાં
હાડ માંસમાં અટવાયેલું મન
પંખી બની ઊડી જાય
નથી થાક નથી દર્દ
નથી તૂટેલા શરીરનો કારાવાસ
એ મન ઊડ્યું આકાશ..
સપના હવે શરીર નથી
એ છે ફકત આત્મા
ચાલ્યો પરમાત્મા વિલીન થવા
સપના વિજાપુરા
17 Dec 2010
યજીદે ફરમાન કર્યુ કે જો ઇમામ હુસૈન મારી બયત કબુલ ના કરે તો એમનુ સર ઉડાવી દો અને મારી પાસે લાવો. ઇમામ હુસૈન જો બયત કરે તો મહમદ પયગંબરનો સાચો સંદેશો લોકો સુધી ના પહોચત. ઇમામ હુસૈન બયત કરવાં ના કહી અને લડાઈની તૈયારી ચાલુ થઈ. યજીદનું લશ્કર ૪૦,૦૦૦ થી એક લાખ સૈનિકોનું હતું એવું ઠોસદાર સબૂત સાથે માનવામાં આવે છે. ઇમામ હુસૈન પાસે કુલ મળીને ૧૩૦ સૈનિકો હતાં. જેમા ૧૦ વરસના બાળકોથી માંડીને ૯૦ વરસના વૃદ્ધ પણ હતાં. આ હતું ઇમામ હુસૈનનુ લશ્કર.
સાતમી મહોરર્મથી યજીદે ઇમામ અને એમના સાથીઓ ઉપર પાણી બંધ કર્યુ. ઇમામના સૌથી નાનાં પુત્ર અલી અસગર છ મહીનાના હતા જે એમની સાથે હતા. જેઓ પાણી વગર અને ખોરાક વગર ત્રણ દિવસ રહ્યા. આ લશ્કર સચ્ચાઈ માટે અને હક માટે લડવા તૈયાર હતું. ભૂખ્યુ ને તરસ્યું. ! આ યુધ્ધમાં શહાદત નક્કી હતી..પણ ઇમામને એ મંજૂર હતું પણ શરાબી અને ભ્રષ્ટાચારીના હાથમાં ઇસ્લામની બાગડોર સોપવી એ મંજૂર ન હતું.
દસમી મહોરર્મ આવી . આશુરા! સવારનો સૂરજ ઉગ્યો. આવી સવાર પહેલાં ક્યારેય ઉગી નથી અને કદી ઉગશે પણ નહી. આ જંગ હતી અસત્યની સામે સત્યની, અન્યાયની સામે ન્યાયની ભ્રષ્ટાચારની સામે પ્રમાણીકતાની અને જુલમની સામે દયા અને સબરની. સવારની અઝાન થઈ. ફઝરની અને ઝોહરની નમાઝ સુધીમાં ઇમામનાં સાથીદારો જેની સંખ્યા પચાસ ગણવામાં આવે છે શહીદ થઈ ગયા. આ બધાં ભૂખ્યાં ને તરસ્યાં શહીદ થયા. ઝોહરની નમાઝ બાદ ઘરનાં બધાં પુરુષો જેમાં ભાઈ,ભાણિયા, ભત્રીજાઓ પુત્રો તથા મિત્રો શહીદ થયા. અંતમાં ઇમામ હુસૈન એકલા રહી ગયા. 57 વર્ષના ઇમામ બહાદૂરીથી લડ્યા પણ જાલીમોએ એમને તીરોથી છલની કરી નાખ્યા. અને ગરદન પર ખંજર ચલાવી એમના મસ્તકને ધડથી જુદું કરી દીધું. આમ દરેક શહીદના મસ્તકને ધડથી અલગ કરી નેજા પર લટકાવવવામાં આવ્યા.
આશુરાનો દિવસ પૂરો થયો. કરબલાના રણની તપતી જમીન ઉપર મહમદ સ.અ. ના ખાનદાનની લાશો રઝળતી રહી કફન વિના! સૂરજ આથમી ગયો. સૈનિકો તંબુઓ તરફ ધસી ગયા. સ્ત્રીઓનાં દુપટા ખેંચી લીધાં અને તંબુઓમાં આગ ચાંપી.
ઇમામ હુસૈનનો સંદેશ હતો કે અસત્ય અને અન્યાય સામે ઝૂકવું નહી. આતંકવાદનો વિરોધ કરવો.ચાહે તેની કિંમત જિંદગીથી પણ ચૂકવવી પડે. અંતમા સત્યનો હમેશા વિજય થાય છે એનો આ એક ઉમદા દાખલો છે કે ઇમામ હુસૈનના રોઝા ઉપર લાખોની સંખ્યામા દુનિયાભરના લોકો દર્શન(ઝિયારત) કરવા કરબલા(ઈરાક) જાય છે. જ્યારે એ જમાનાની અરબસ્તાનની સલ્તનનના ગવર્નર યઝીદનું કોઇ નામ નિશાન નથી. આમ છતાં કેટલીક જગ્યાએ આજના જમાનામાં યજીદ જેવા આતંકવાદીઓ ઇસ્લામને બદનામ કરી રહ્યા છે એ દુ:ખદ વાત છે.
આશુરા=૧૦ મો દિવસ અહીં દસમો દિવસ મોહરર્મ મહીનાનૉ દસમો દિવસ
નવાસા = દોહિત્ર= મહમદ સ.અ ના દીકરીનાં દીકરા
બયત કબુલ કરવી=એની મરજી પ્રમાણે ચાલવું
સત્યમેવ જયતે..
નીચે ભારતના મહાનુભાવો ઇમામ હુસૈન વિષે કહે છે ..
મહાત્મા ગાંધીજી કહે છે ” અન્યાય થતો હોય છતાં જીત કેવી રીતે મેળવવી એ હુસૈન પાસેથી શીખ્યો છું. ” ઇસ્લામ તલવારથી નહીં પણ હુસૈનનની કુરબાનીથી વિકાસ પામ્યો છે.
જવાહરલાલ નેહરુ: “ઇમામ હુસૈન (અ.સ.)નું બલિદાન તમામ જૂથો અને સમુદાયો માટે છે, જે સચ્ચાઈના માર્ગનું ઉદાહરણ છે.”
રવીન્દ્રનાથ ટાગોર: “ન્યાય અને સત્યને જીવંત રાખવા માટે, લશ્કર અથવા શસ્ત્રોને બદલે, જીવનની કુરબાની આપીને સફળતા પ્રાપ્ત કરી શકાય છે, બરાબર તે જ ઇમામ હુસૈન (અ.સ.)એ કર્યું હતું.
ડૉ. રાજેંદ્ર પ્રસાદ “ઇમામ હુસૈન (અ.સ.)નું બલિદાન માત્ર દેશ કે રાષ્ટ્ર પૂરતું મર્યાદિત નથી, પરંતુ તે સમગ્ર માનવજાતના ભાઈચારાની વારસાગત સ્થિતિ છે.”
ડૉ . રાધાક્રિષ્નન : જો કે ઇમામ હુસૈન (અ.સ.) એ લગભગ 1300 વર્ષ પહેલા પોતાનો જીવ આપ્યો હતો, પરંતુ તેમનો અવિનાશી આત્મા આજે પણ લોકોના હૃદય પર રાજ કરે છે.”
સ્વામી શંકરાચાર્ય : “હુસૈન (અ.સ.)ની કુરબાનીએ જ ઇસ્લામને જીવંત રાખ્યો છે નહીંતર આ દુનિયામાં ઇસ્લામનું નામ લેનારું કોઇ બચશે નહીં.
શ્રીમતી સરોજિની નાયડુ : “હું મુસ્લિમોને અભિનંદન આપું છું કે તેમની વચ્ચેથી, હુસૈન (અ.સ.) એક મહાન માનવીનો જન્મ થયો, જેને તમામ સમુદાયો દ્વારા સંપૂર્ણ રીતે પુનરાવર્તિત અને સન્માનિત કરવામાં આવે છે.
સપના વિજાપુરા
12 Dec 2010
જમાના જુલમ ના હવે કર વધુ
ઘણું આજ તક તેં સતાવ્યું છે દિલ
હતી જંગ દિલને દિમાંગો વચે
દિમાગે તો અંતે હરાવ્યું છે દિલ
ભરાયે નયનમાં અશ્રુઓ ક્દી
મનોહર છબીએ હસાવ્યું છે દિલ
કરો આમ ને તેમ પણ ના કરો
સો સો તીર મારી વિંધાવ્યુ છે દિલ
જહન્નમી કહેનાર જોતા રહી ગયાં
ખુદાએ હસીને વધાવ્યું છે દિલ
હતી આમ તો વાત નાની છતાં
ફરી ને ફરી તે તપાવ્યું છે દિલ
તબીબો તો થાકી ગયાં છે હવે
અરે નામ કોનું મઢાવ્યું છે દિલ
બતાવ્યા છે આંખો ને ‘સપનાં’ ઘણાં
ન એકેય સાચું ઠરાવ્યું છે દિલ
સપના વિજાપુરા
મિત્રો,
આજે આ ગઝલ સાથે એક રેડિઓ સ્ટેશનની લિન્ક આપું છું..જેની મુલાકાત જરૂર લેશો..આપણાં સર્વનાં માનીતાં શ્રી વિજયભાઈ શાહ જેનાં મુખ્ય અતિથિ બન્યા હતા ..તેઓ ગુજરાતી ભાષાને જીવંત રાખવા તન તોડ મહેનત કરે છે..આ પ્રોગ્રામમાં આપ મારી તથા ભરતભાઈ દેસાઈની ગઝલનું પઠન પણ સાંભળી શકશો..આપ સર્વને અમારું હાર્દિક આમંત્રણ છે..
આપની મિત્ર સપના
