31 Mar 2020
નડવું નથી
કોઈને સીડી બનાવીને ઉપર ચડવું નથી
ને હટાવીને ફરી એને ય બસ પડવું નથી
હા તમે સાચા જ છો માની લઉં છું વાત એ
વાત વાતે રોજ કોઈ સંગ ના લડવું નથી
લો બનાવી સ્મિત રાખો આપના મુખચંદ્ર પર
કે તમારી આંખનું આંસું થઈ દડવું નથી
રેશમી પાપણમાં છૂપાવી દો એ રીતે મને
છો જગત આખું મને શોધ્યાં કરે, જડવું નથી
જૂઠ મીઠું હોય છે કાનો ને ગમતું હોય છે
પણ ગળે જો ઉતરે આ સત્ય પણ કડવું નથી
હાથ જોડી ને હું માફી આજ માંગું આપની
નર્કમા તો જિંદગીભર મારે પણ સડવું નથી
માર્ગથી એનાં હટી જા બસ હવે “સપના”તું તો
કોઈને પણ આપણે પથ્થર થઈ નડવું નથી
સપના વિજાપુરા
